炒粒粒

真係大頭蝦，

雪櫃仲有包五香豆干未食，

又買咗一包返嚟，

要食咗舊嗰包先！

要嚟炒粒粒，

食生菜包！

混醬排骨

嚟慣嚟熟嘅腦友都知我幾鍾意混醬，

趁姑仔喺度，

我又混醬比佢睇！

材料：
唐排 1kg
洋葱一隻切條
蒜2粒切片

汁料:
茄汁3湯匙
海鮮醬1湯匙
磨豉醬半湯匙
韓國辣醬半湯匙
生抽2湯匙
鹽半茶匙
冰糖碎1湯匙
紹酒2湯匙
麻油少許
水半杯


做法：
燒紅鑊，下油，爆香洋蔥蒜片，加入汁料煮沸，
將唐排加入，用慢火煮至排骨腍及汁液濃稠即成

做節！

今年真係好懶，

唔係好想煮大餐，

不過中秋係大節,

㸃都要一家人食餐飯。

早前減價入咗兩隻羊腿，

趁人多攞隻出嚟食咗佢，

我地唐人節食西餐!

無規定一定要食唐餐啫!

2.7kg羊腿用明爐BBQ 爐烤熟，非常之正

薯仔沙律好搶手

焗釀大蘑菇,

有人嫌少唔夠食

中秋節快樂

祝各位中秋節快樂

人月兩圓圓！

我地唔曬月光，

矖太陽！

豉油皇肉絲炒麵

買咗一大包麵，

加埋多多配菜，

炒出一大鑊，可以食三餐!

咁啱㗎！

噚日，

我同大老爺去 IKEA 買個細櫃比奶奶擺衣服，

之後去肉佬度大入貨，

去開越南區梗係順便食埋越南粉啦，

啱啱坐落，

隔離檯來咗父女兩人，

開頭都無為意，

睇真啲咁熟面口嘅？

哈哈！

原來係美少女嘅父親大人和姊姊,

咁梗係即時過檯一齊食啦，

人地父親大人開口話二少爺仲未向佢提親喎，

咁！

二少爺識做啦！

白菌雞柳煲

大老爺返下午班，

得我同姑仔兩個食飯，

簡單啲，

一煲過，

快靚正

材料：

雞胸肉一隻切厚片

白菌十隻一開二

西生菜半隻

薑2片，

蒜2粒

調味料：

蠔油1湯匙半

糖半茶匙

水半杯

老抽半茶匙

做法：

雞肉用生抽1湯匙，䀋半茶匙，糖半茶匙，油拌勻，醃約半小時

生菜灼熟放煲仔中

燒紅鑊，下油，將薑，蒜爆香

將雞肉加入煎至半熟，將白菌加入兜炒至雞肉熟，

將調味汁加入煮滾，埋獻，將所有材料放在生菜面即成

新居

奶奶今日搬去新居呀,

新居環境唔錯，

今日第一日，

我地仲有免費午餐添！

二少喂嫲嫲食晏

免費午餐：

火雞肉

豬肉

甜品係麵包布丁

食晏@茨廠街

星期日去咗茨廠街食晏，

我嘅椰醬飯

大老爺嘅咖哩牛肉加薄餅

姑仔嘅蛋包飯

轉路線

行咗幾日同一路線，

試下行叧外一條路線，

唔行平路，行山路,

行到頂有個觀景台

晨運

無去晨運幾個星期，

唔可以再懶，

啲起心肝出去行番個圈，

姑仔未行過屋企附近嘅單車徑，

一行到去，

姑仔即刻感覺到大分別，

前面仲係住宅區，

後面就即刻變成大自然影色！

春江水䁔，

仲有雀鳥睇添！

韭菜炒蛋

早幾日天氣回暖，

著咗2日短䄂衫又變天了,

天氣又轉寒，

不過全靠嗰2日䁔天氣，

啲韭菜即刻快高長大，

已經可以摘了，

第一摘用嚟炒蛋！

香茅雞翼

啲香茅捱過咗寒冬，

新枝開始出，

等我剪咁的讓位比啲新枝生長，

剪咗出嚟嗰啲除咗煮餸，

仲煮咗香茅茶飲添呀!

材料：
雞翼1kg, 斬件
香茅一支, 只要白色部份，剁碎
蒜頭2位剁蓉
芫荽碎一湯匙
辣椒一隻剁碎


醃料：
鹽半茶匙
魚露1湯匙
生抽半湯匙
老抽1茶匙
紹酒1湯匙
糖1茶匙


做法：
雞翼用醃料醃約2小時
燒紅易潔鑊，不用下油，將雞翼煎至兩面金黃，取出待用
下油，將香茅爆香，加入蒜蓉爆香，
雞翼回鑊兜勻，加入餘下醃料及水共 1/4 杯,
上蓋，將雞翼煮熟及汁液收乾，
將辣椒及芫荽加入兜勻，即可上碟

豉汁炒雞柳

姑爺返咗 L.A.,

少咗一個人食飯，

真係可以煮得簡單啲！

蟲草花蒸雞

我都算鄉下架啦，

上年先開始煮蟲草花嚟食，

點知姑仔仲鄉下過我，

咁又整比姑仔食下！

午餐@發記

姑爺已經返咗美國，

姑仔改機票留多一個月，

姑爺走前一日我地去發記食港式炒粉麵

福建炒飯

乾炒牛河

三絲炒麵

半隻燒鴨

醬燒豬面肉

原來姑仔未食過豬面肉， ( 即係香港嘅豬頸肉 )

梗係要整次比佢地食啦，

食完猛讃好食，

咁返 L.A. 後要揾下肉檔有冇得賣啦！材料：

材料：

豬面肉1kg

醃料：

磨豉醬半湯匙

海鮮醬1湯匙

茄汁1湯匙

豆辧醬半湯匙

紹酒1湯匙

生抽1湯匙

鹽半茶匙

糖1茶匙

做法：

豬面肉用醃料醃2小時以上，

入預熱焗爐 200C 用上火每面焗5分鐘即成

南乳蒜香雞

最後一隻 2.7kg 大雞，

趁人多拎出嚟食咗佢，

點知都係食唔哂

揀咗呢間

經過一星期嘅頻撲，

睇咗十幾間安老院，

終於揾到間啱心水，

又近屋企嘅安老院，

申請表交咗嘞，

睇幾時可以將奶奶搬過去！

睇中呢款單人套房

蒜泥白肉

呢輪好頻撲，

要煮啲快靚正嘅餸菜，

出街前烚好啲腩肉，

返嚟切片就食得

鋸扒

噚日中場休息睇咗兩間安老院，

一間在越南區，

貪佢多華人，

另外一間又係新開無耐，

環境和房間真係唔錯，

只係額外收費每日要45蚊,

除咗電視，電話外，家人仲可以陪同一齊用餐，

但係我無可能日日走去食佢一餐嗰喎，

呢個收費就真係離譜！

日日咁頻撲，

好攰，

夜晚唔煮飯，

去咗後備飯堂食！

午餐@ Isshin

最初醫生話要轉送奶奶去善終服務，

但係神跡出現，

又或者上面客滿,

奶奶嘅精神一日比一日好，

所以奶奶轉送咗去中途宿舍再等安老院床位，

噚日中場休息食完晏又再去參觀安老院呀！

蘿蔔炆豬手

末來會有好多支出，

慳得就慳，

我又嚟玩一豬手兩吃，

買咗一隻豬手，

加的冬菇，

用咗腦友記送我嘅星加波肉骨茶湯包，

煲咗肉骨茶比姑仔飲，

煲完湯嘅豬手和冬菇循環再用,

加隻蘿蔔用混醬去炆，

個個都讃好味！